09-05-2014
Skeinkiloyvi
Ætlar tú at selja rúsdrekka til viðskiftafólkið, skal søkjast um skeinkiloyvi. Tað er loyvisnevndin, sum tekur støðu til umsóknir um skeinkiloyvi. Har eru ymiskar treytir, sum skulu lúkast, áðrenn skeinkiloyvi verður játtað. Ein treyt er, at virksemið frammanundan hevur matstovuloyvi.
Umsókn um skeinkiloyvi er at senda til
Føroya Landfúta. Vendið tykkum til Føroya Landfúta viðvíkjandi umsóknarblaðnum. Fútin sendir síðani umsóknina til avvarandi myndugleikar:
•
Føroya Landfúti•
Loyvisnevndin•
Heilsufrøðiligu Starvsstovuna•
Vørn•
(Arbeiðseftirlitið)
• Avvarandi kommunu
Myndugleikarnir viðgera umsóknina og senda tilmælið til Føroya Landfúta. Tá ið viðmælið er komið aftur til fútan, verður tað sent loyvisnevndini, ið gevur loyvið. Skeinkiloyvi er galdandi í 4 ár.
Søkjast skal um endurnýggjan av loyvi tríggjar mánaðar, áðrenn loyvið gongur út. Eisini skal søkjast av nýggjum, tá viðurskiftini eru broytt t.d. eigaraskifti, nýtt partafelag, flyting og broyting av innrætting.