FORSÍÐA
Tú ert her: GREINAR <<


25-06-2020

Ung í arbeiði fríðka um býarmyndina

Hesa vikuna byrjaði væl umtókta átakið “Ung í arbeiði”, á Tvøroyri. Tvøroyrar kommuna hevur, síðan kreppuna í byrjanini av nítiárunum, havt hetta tilboðið til tey ungu í býnum. Her ber til at forvinna sær eitt oyra í summarferiuni, samstundis sum tú ert við til at fríðka um býin.

Í dag vóru nøkur av teimum ungu og arbeiddu í gamla kirkjugarðinum í Ørðavíkarlíð. Kirkjugarðurin hevur ikki verið nýttur síðan síðst í áttatiárunum, men áðrenn farið varð frá honum, vórðu uml. 1300 fólk grivin har síðan hann varð tikin í brúk. Hann trongdi til eina kerliga hond og tí var tað kærkomið við hjálp frá ungdóminum.

Tey 6, Poul, Vár, Julia, Rakul, Eir og Olivur, gjørdu ymiskt fyrifallandi ta løtuna vit vitjaðu: Tey slógu m.a. gras, rakaðu saman og koyrdu grasið burtur. Tey vóru øll glað fyri møguleikan at forvinna sær nøkur oyru, nú summarferia er. Flestu teirra høvdu ivaleyst ætlað sær at nýtt peningin til eina uttanlandsferð, men núverandi støðan í heiminum ger, at tey flestu setast aftur og vera verandi í Føroyum. Tað tóktist tó ikki sum um nakar teirra hevði trupulleikar av at finna útav, hvat peningurin skuldi brúkast til – tey skuldu njóta summarið, við øllum tí, ið tað kann bjóða.

Hóast tey bara hava verið í arbeiði í 3 dagar, so hava tey roynt mangt og hvat. Olivur hevur verið við í einum av lastbilunum hjá kommununi og tømt kommunalu ruskspannirnar, Julia og Rakul hava hjálpt til hjá Tvøroyrar Havn, har tær hava ruddað havnarlagnum og í mølini og Vár og Eir hava roynt at mála í Tvøroyrar Skúla. Næst á skránni er m.a. at mála brúgvarnar um Ósan, ið trongja harðliga til at verða málaðar.

Arbeiðsleiðari hjá teimum er Jack Petersen. Spurd inn til, hvat teimum dámdu arbeiðsleiðaran, svaraðu tey í kór - “kongur”, so Jack er væl dámdur millum tey ungu.

Tvøroyrar kommuna takkar fryntliga ungdóminum fyri prátið og fyri at vera við til at fríðka um deiliga bý okkara.

Fleiri myndir eru at síggja á síðuni hjá Tvøroyrar kommunu her 
 
 



, Tvørávegur 37, Postboks 80, 800 Tvøroyri - Tlf. 611085 - tvoroyri@tvoroyri.fo Persónupplýsingar Rita inn