MÝRIFÍPAN MØGULIGA ÚTBYGGJAST TIL 20 BØRN AFTURAT
Í september 2020 varð nýggi parturin av barnagarðinum Mýrifípan tikin í nýtslu. Hetti førdi alt fyri eitt við sær, at fleiri barnafamiljur valdu at flyta til Tvøroyrar. Tað gleðiliga hendi so, at stovnurin rættuliga skjótt fyltist.
Í løtuni hoyra uml. 160 børn til barnaansingarøkið í Tvøroyrar kommunu og av teimum hava gott 100 sína dagligu gongd í sjálvari Mýrifípuni.
Á býráðsfundi í Tvøroyrar kommunu hin 26. september, heitti býráðið á borgarstjóran, Kristin Michelsen, um at kanna møguleikan at útbyggja barnagarðin.
Borgarstjórin hevur í tí sambandi longu verið í samband við lokala arkitektin, Páll Lave, ið er arkitektur og byggirøðingur hjá Brim Arkitektum. Júst Páll og Brim Arkitektar, stóðu fyri útbyggingini í 2020.
”Nú verður hugt at hvussu stórur tørvurin er á útbygging og hvussu vit fáa hetta framt í verki, vísir tað seg neyðugt. Ætlanin er eisini at uppraðfesta útiøkið kring barnagarðin í næstum”, sigur Kristin Michelsen, borgarstjóri. ”Verður staðfest at tørvur er á útbygging og tað letur seg gera, so verður farið skjótt í gongd”, leggur hann at enda afturat.
