KVØLD -OG UNGDÓMSSKÚLI
Tú ert her: KVØLD -OG UNGDÓMSSKÚLI << - GREINAR
Miðtún 4
800 Tvøroyri
kvungskuli@tvoroyri.fo
15-08-2020

ÁHEITA UM VARSEMI Í FERÐSLUNI, NÚ SKÚLIN BYRJAR AFTUR

Tvøroyrar Kommuna og Ráðið fyri Ferðslutrygd minna bilførarar á at vísa serligt ansni, nú børnini fara í skúla aftur í komandi viku.

Tann 18. august byrja skúlarnir aftur. Hetta merkir, at tað aftur verða børn í ferðsluni á veg í og úr skúla. Og fyri umleið 700 børn, verður hetta eisini fyrstu ferð, tey fara í skúla.

Vit skulu altíð geva bleytu ferðsluni gætur, men tá skúlarnir byrja, skulu vit vera serliga varin. Um hetta mundið kunnu vera fleiri børn, ið eru smá og óroynd í ferðsluni. Tað krevur, at ferðin verður sett niður, og at vit eru gáin.

16 kommunur heingja plakatir upp

Aftur í ár samstarva kommunur og Ráðið fyri Ferðslutrygd um átakið. Við skúlar verða skelti hongd upp, við áheitan um at vísa ansni.

16 kommunur eru við í átakinum hesa ferð. Hesar eru: Eiðis -, Eystur -, Fuglafjarðar -, Hvalbiar -, Klaksvíkar -. Kvívíkar -, Porkeris -, Runavíkar -, Sjóvar -, Sunda -, Sørvágs -, Tórshavnar -, Tvøroyrar -, Vága -, Vágs – og Vestmanna kommuna.

Tilfar til foreldur

Men skelti gera tað ikki einsamøll. Tí leggur Ráðið fyri Ferðslutrygd upp til, at foreldur fara út í ferðsluna við børnunum at venja tey. Tað krevur venjing og royndir at gera børnini til trygg vegfarandi og at læra tey, hvørjum tey skulu ansa eftir á vegunum.

Tað er tíbetur sjáldan, at børn í føroysku ferðsluni fáa skaða, og hetta er millum annað tí, at foreldur duga væl at ansa eftir teimum, og hesum skulu vit halda fast í.

Tá barnið byrjar í skúla, er hetta ein nýggj støða, og hon krevur at barnið dugir at bera seg rætt at í ferðsluni. Barnið lærir ikki um ferðslutrygd av baksetrinum í bilinum, ella við at hyggja í eina bók. Tí verður mælt til, at foreldur fara út í ferðsluna saman við barninum. Tess meira foreldur og børn venja í ferðsluni, tess raskari verður barnið at ferðast sjálvt.

Allir næmingar í 1. flokki fáa ein súkkluhjálm og faldara við góðum ráðum til trygga atferð í ferðsluni. Eisini eru góð ráð og venjingar at finna á www.rff.fo. Í heyst fáa tey yngstu eisini endurskinsvest. Harumframt er ferðsla kravt undirvísingarevni í skúlanum.

 
 
 
 



Kvøld -og ungdómsskúli, Miðtún 4, 800 Tvøroyri - kvungskuli@tvoroyri.fo